နိုင်ငံတော်သံဃမဟာနာယကအဖွဲ့ ၄၇ ပါး စုံညီစည်းအဝေးကို ဇူလိုင်လဆန်းတွင် ပြုလုပ်သွားမည်ဖြစ်ကြောင်း ဇွန် ၁၆ ရက် ညပိုင်းက မြန်မာ့ရုပ်မြင်သံကြားမှ အဆိုပါအစည်းအဝေးသို့ တက်ရောက်ရန် နိုင်ငံတော် သံဃမဟာနာယက ဆရာတော်ကြီးများ ပင့်လျှောက်သည့် သတင်းဖော်ပြချက်အရ သိရသည်။
သတ္တမအကြိမ်မြောက် နိုင်ငံတော်သံဃမဟာနာယကအဖွဲ့ ၄၇ ပါးစုံညီ ပဉ္စမအစည်းအဝေးကို ဇူလိုင် ၂ ရက်၊ ၃ ရက်၊ ၄ ရက်များတွင် အကြိုညှိနှိုင်းအစည်းအဝေးနှင့် ၅ရက်၊ ၆ ရက်များတွင် အစည်းအဝေးကျင်းပမည် ဖြစ်သောကြောင့် နိုင်ငံတော်သံဃမဟာနာယက ဆရာတော်ကြီးများသည် ဇူလိုင် ၁ ရက်အရောက် ရန်ကုန်မြို့ သို့ကြွရောက်တော်မူပါရန် ပင့်စာများဖြင့် ပင့်လျှောက်ထားပြီးဖြစ်ကြောင်း သိရသည်။
ဆရာတော်ကြီးများထံသို့ ပင့်စာများ အချိန်မီ မရောက်ရှိပါက အထက်ပါနေ့ရက်များတွင် ရန်ကုန်မြို့ ကမ္ဘာအေးကုန်းမြေသို့ အရောက် ကြွရောက်တော်မူကြရန် သာသနာရေးဦးစီးဌာနမှ ပင့်လျှောက်ထားကြောင်း သတင်းဖော်ပြချက်အရ သိရသည်။